reem193:

تقول له فاكر .. يرد فاكرة 
ورق التذاكر 
ورق المذاكرة 
كل الأغانى .. يعيدوها تانى 
و هو فاكر .. و هى فاكرة 

أول قصيدة فى جواب مكرمش 
و كوبرى بنها و سميط مقرمش
يـحمّر وش الصبية فجأة 
هو يسبّل .. هى تبربش
تقول له فاكر .. يرد فاكرة

برج الجزيرة و الناس طشاش 
باينين كما نمل و فراش 
الدنيا خليّت .. مافضلش غيرهم
قالت تبوسه .. قام قلبه باش 
تقول له فاكر .. يرد فاكرة

و العود يرن الحنين فى قلبه 
لمّا يحس ان هى جنبه 
ع الفجر يدعه فى كل ليلة 
يا رب كل البشر يحبّوا

تقول له فاكر .. يرد فاكرة 

على شط جمصة ضاع منِّى صندل 
على شط بحر المتاهة ضعت 
و طعم بوسة فى قلبى حنضل 
و رغم كل الوجع رجعت 

أنا قلبى خردة مالهش قيمة 
ياللى تحبى الحاجات قديمة 
هدوم قديمة 
يُفَط قديمة 
جبنة قديمة 
حواديت قديمة 
تقريها فى جرايد قديمة 
تلاقيها جوّه بيوت قديمة 
خدى قلبى حتة أنتيكة نادرة 
و قولى له فاكر .. 
ح يرد فاكرة 

حاسب علي كل ضحكة احسن ممكن تضيع

الحب مهوش كامنجة ومعاده مش ربيع

خدني الشوق للطفولة ولصوت عبد الحليم وسطوح بيتنا القديم 

ياما لعبنا اولي وكنا اطفال وجيرة في طريق المدرسة

كل الماضي اتنسي وانا فكيت الضفيرة 

والكل بقاله سكة ماشي في طريق سريع 

حاسب علي كل ضحكة احسن ممكن تضيع

فاكر وانت في غربة علي الشط هناك فرشتنا 

فاكر بالليل ماشيتنا من روكسي لحد الكربة

الشارع يختلف عن يوم ما كنت جمبي

 عن اول مرة قلبي بحبك يعترف

يا جنينة وفيها دكة فين الشاب الوديع 

حاسب علي كل ضحكة احسن ممكن تضيع

ياليل يا براح يا شارع يا كل مكان جمعنا

كان ضيق وسعنا قولولي انه راجع

بتمني أي بهجة تهدي الجو الفظيع

حاسب علي كل ضحكة أحسن ممكن تضيع

حواديت قديمة 
أحمد حداد - فاطمة عادل - سلمي صباحي 

إهداء لأحمد علي :)